«Сантос» футболчиси Неймар 17-апрел куни Бразилия чемпионати доирасидаги «Атлетико Минейро»га қарши ўйинда (2:0) чап сон қисмини жароҳатлаб олган ва 34-дақиқада алмаштирилган эди.
УОЛ порталининг хабар беришича, 33 ёшли футболчи клуб базасида кунига 11 соат машқ қилмоқда. У ҳафтанинг бир неча кунида икки маҳал ишлашда давом этмоқда. Шу сабабли тикланиш жараёни яхши ўтмоқда.
Футболчи шифокорлар тавсияларига амал қилаётгани айтилмоқда ва у майдонга май ойининг охири ёки июнь ойининг бошларида қайтиши мумкин. «Сантос»нинг тиббий штаби маълум қилишича, Неймар ҳеч қачон бунчалик кўп машқ қилмаган.
Вингернинг Бразилия клуби билан амалдаги шартномаси шу йилнинг 30-июнига қадар давом этади. Яқин кунларда томонлар шартномани узайтириш масаласини муҳокама қилиши кутилмоқда.
