Қўлингиздаги гаджетларингизда кўраётган, эшитаётган ва ўқиётган ахборотларингизга руҳият бағишлаётган нашр бугун 4 ёшда!
Тaftish.uz веб-сайти ОАВ сифатида 2021-йил 24-март куни Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги томонидан 1402-сон билан давлат рўйхатига олинган.
Бола туғилганидан то юриб кетгунига қадар она қанча машақатларни бошидан ўтказади дейдиган бўлсак, бу нашрни яратганлар, ичида меҳнат қилаётган журналистлар сайтнинг бугунги кунга келгунига қадар ҳам шу босқичларни бошидан кечирган десам менимча адашмаган бўламан.
Таftish.uz - энг сўнгги янгиликлар ва қизиқарли мақолалар бериб бориладиган онлайн нашр ҳисобланади. Сайт контентидан тезкор янгиликлар билан бир қаторда, қизиқарли, фойдали мақолалар, долзарб мавзулар ҳамда сиёсат, иқтисод, жамият ва бизнес каби йўналишлардаги таҳлилий-танқидий материалларни ўқишингиз мумкин.
Бир пайтлар орзу бўлган йўллардан катта қадамлар ила юриб бораётган нашримиз бугунга келиб озми-кўпми ютуқларга эришди. Бизни танишмоқда, ўқишмоқда, меҳнатимизни муносиб баҳолашмоқда...
Ахборот сайтимизнинг мақсад ва вазифаларига келадиган бўлсак:
- жамиятга тўғри, холис ва ишончли ахборотларни етказиш, Ўзбекистон ва жаҳонда рўй бераётган ўзгаришлар, воқеа-ҳодисаларни содда ва тушунарли шаклда очиб бериш;
- демократик-ҳуқуқий давлат қуриш ва адолатли фуқаролик жамиятини янада ривожлантириш йўлидаги ислоҳотлар ва уларнинг самарасини кенг оммага етказиб бериш;
- миллий-маданий қадриятлар ва анъаналарни сақлаб қолган ҳолда маънавият ва маърифатни ривожлантириш йўлида олиб борилаётган давлат сиёсатини халққа етказиш;
- бугунги ахборот технологиялари асрида турли хил бузғунчи ва сиёсий мақсадларда тарқатилаётган ёлғон ахборотларнинг асл моҳиятини очиб бериш орқали, одамларда ишончли ахборотларни нотўғрисидан фарқлай билиш кўникмасини ошириш, жамиятда «фейк» ахборотларга қарши иммунитетнинг шаклланишига ҳисса қўшишдан иборат.
Биз куну тун турли мазмундаги хабарларни тайёрлар эканмиз, уларнинг сизга ҳам нечоғлиқ кайфият улашишини, руҳиятингизга қандайдир таъсир кўрсатишини биламиз. Бугун дунёйимизда содир бўлаётган урушлар, етимлар фарёдини кўриб, ҳис қилиб қоғозга муҳрлар эканмиз, касбимиз нечоғлиқ машаққатли эканини англаб етмоқдамиз. Буни фақат биз билан бир даврда яшаб, ахборот қозонида қайнаётганлар тушуна олади.
Сиз ўқиб, кўриб турган бу мақола ва материаллар ортида қанчадан-қанча одамларнинг дарду фарёдлари, ота-онасидан ажраган мурғак гўдакларнинг кўз ёшлари ётибди... Буларнинг барчасини ҳис қилиб, ҳар бирининг ўрнига ўзимизни қўйиб, йиғлаш керак жойида йиғлаймиз, юрак оғриқларини тотамиз... Сизга ишончли ахборот етказиш йўлида бир кўприк вазифасини ўтаймиз...
Тонг отганидан то кун ботгунига қадар изланишда бўлиб, ҳар қачонгидан тез, сифатли, холис ва ишончли ахборот етказиш учун тиним билмай ишлаётган журналистларнинг куни сизникидан фарқли. Лекин шунда ҳам биз ўз касбимизни яхши кўрамиз.
Таҳририятимизга аҳолидан келиб тушаётган мурожаатлар, хатларга имкон қадар жавоб беришга, муаммосини айтиб келган одамнинг дардкашига айланишга ҳаракат қиламиз. Ахир биз Сизнинг Taftishʼингизмиз.
Бугунги кунда таҳририятимиз жамоаси самарали фаолият кўрсатиш йўлида исталган турдаги ОАВ, шунингдек, Ўзбекистон ҳудудида фаолият олиб бораётган давлат ва жамоат ташкилотлари билан қонунда белгиланган тартибда ҳамкорлик қилишга тайёр.
Taftishʼингиз сизни қайноқ янгиликлардан хабардор қилишда давом этади. Бизнинг ахборот кўчасидаги йўлимиз узун. Унга ҳамоҳанг умримиз ҳам бардавом бўлсин!
Бизни ўқиганингиз, кўрганингиз ва эшитганингиз учун раҳмат!
