Qo‘lingizdagi gadjetlaringizda ko‘rayotgan, eshitayotgan va o‘qiyotgan axborotlaringizga ruhiyat bag‘ishlayotgan nashr bugun 4 yoshda!
Taftish.uz veb-sayti OAV sifatida 2021-yil 24-mart kuni Oʻzbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi tomonidan 1402-son bilan davlat ro‘yxatiga olingan.
Bola tug‘ilganidan to yurib ketguniga qadar ona qancha mashaqatlarni boshidan o‘tkazadi deydigan bo‘lsak, bu nashrni yaratganlar, ichida mehnat qilayotgan jurnalistlar saytning bugungi kunga kelguniga qadar ham shu bosqichlarni boshidan kechirgan desam menimcha adashmagan bo‘laman.
Taftish.uz - eng so‘nggi yangiliklar va qiziqarli maqolalar berib boriladigan onlayn nashr hisoblanadi. Sayt kontentidan tezkor yangiliklar bilan bir qatorda, qiziqarli, foydali maqolalar, dolzarb mavzular hamda siyosat, iqtisod, jamiyat va biznes kabi yo‘nalishlardagi tahliliy-tanqidiy materiallarni o‘qishingiz mumkin.
Bir paytlar orzu bo‘lgan yo‘llardan katta qadamlar ila yurib borayotgan nashrimiz bugunga kelib ozmi-ko‘pmi yutuqlarga erishdi. Bizni tanishmoqda, o‘qishmoqda, mehnatimizni munosib baholashmoqda...
Axborot saytimizning maqsad va vazifalariga keladigan bo‘Isak:
- jamiyatga to‘g‘ri, xolis va ishonchli axborotlarni yetkazish, O‘zbekiston va jahonda ro‘y berayotgan o‘zgarishlar, voqea-hodisalarni sodda va tushunarli shaklda ochib berish;
- demokratik-huquqiy davlat qurish va adolatli fuqarolik jamiyatini yanada rivojlantirish yo‘lidagi islohotlar va ularning samarasini keng ommaga yetkazib berish;
- milliy-madaniy qadriyatlar va anʼanalarni saqlab qolgan holda maʼnaviyat va maʼrifatni rivojlantirish yo‘lida olib borilayotgan davlat siyosatini xalqqa yetkazish;
- bugungi axborot texnologiyalari asrida turli xil buzg‘unchi va siyosiy maqsadlarda tarqatilayotgan yolg‘on axborotlarning asl mohiyatini ochib berish orqali, odamlarda ishonchli axborotlarni noto‘g‘risidan farqlay bilish ko‘nikmasini oshirish, jamiyatda “feyk” axborotlarga qarshi immunitetning shakllanishiga hissa qo‘shishdan iborat.
Biz kun-u tun turli mazmundagi xabarlarni tayyorlar ekanmiz, ularning sizga ham nechog‘liq kayfiyat ulashishini, ruhiyatingizga qandaydir taʼsir ko‘rsatishini bilamiz. Bugun dunyoyimizda sodir bo‘layotgan urushlar, yetimlar faryodini ko‘rib, his qilib qog‘ozga muhrlar ekanmiz, kasbimiz nechog‘liq mashaqqatli ekanini anglab yetmoqdamiz. Buni faqat biz bilan bir davrda yashab, axborot qozonida qaynayotganlar tushuna oladi.
Siz o‘qib, ko‘rib turgan bu maqola va materiallar ortida qanchadan-qancha odamlarning dard-u faryodlari, ota-onasidan ajragan murg‘ak go‘daklarning ko‘z yoshlari yotibdi... Bularning barchasini his qilib, har birining o‘rniga o‘zimizni qo‘yib, yig‘lash kerak joyida yig‘laymiz, yurak og‘riqlarini totamiz... Sizga ishonchli axborot yetkazish yo‘lida bir ko‘prik vazifasini o‘taymiz...
Tong otganidan to kun botguniga qadar izlanishda bo‘lib, har qachongidan tez, sifatli, xolis va ishonchli axborot yetkazish uchun tinim bilmay ishlayotgan jurnalistlarning kuni siznikidan farqli. Lekin shunda ham biz o‘z kasbimizni yaxshi ko‘ramiz.
Tahririyatimizga aholidan kelib tushayotgan murojaatlar, xatlarga imkon qadar javob berishga, muammosini aytib kelgan odamning dardkashiga aylanishga harakat qilamiz. Axir biz Sizning Taftishʼingizmiz.
Bugungi kunda tahririyatimiz jamoasi samarali faoliyat ko‘rsatish yo‘lida istalgan turdagi OAV, shuningdek, O'zbekiston hududida faoliyat olib borayotgan davlat va jamoat tashkilotlari bilan qonunda belgilangan tartibda hamkorlik qilishga tayyor.
Taftishʼingiz sizni qaynoq yangiliklardan xabardor qilishda davom etadi. Bizning axborot ko‘chasidagi yo‘limiz uzun. Unga hamohang umrimiz ham bardavom bo‘lsin!
Bizni o'qiganingiz, ko'rganingiz va eshitganingiz uchun rahmat!
