Osiyo futbol konfederatsiyasi Qarshining “Nasaf” klubini jarimaga tortdi.
Bunga jamoaning OFK kubogi 2021-yilgi mavsum doirasidagi Gonkongninng “Li Man” klubi bilan uchrashuvda xavfsizlik va karantin qoidalariga rioya etmagani asos boʻlgan.
Tartib-intizom qoʻmitasining qarorlarida keltirilishicha “Nasaf” va “Li Man” jamoalari oʻrtasidagi uchrashuvda bir qator qoidabuzarliklar qayd etilgan:
Unga koʻra:
-320 nafar muxlis futbolchilar zaxirasi uchun moʻljallangan joyga oʻtirgan;
-2 nafar muxlis hakamning yakuniy hushtagi chalinganidan keyin maydonga tushib ketgan;
-klub xavfsizlik boʻyicha oʻz zimmasidagi vazifalarni taʼminlay olmagan;
-maydon atrofida akkreditatsiyasi yoʻq shaxslar yurgan;
-tomoshabinlar stadionda tamaki chekkan.
OFKning Tartib-intizom qoʻmitasi yuqoridagi holatlarni oʻrganib chiqib, qaror chiqargan:
Qarorga muvofiq:
1) “Nasaf” tartib-intizom kodeksining 22.2 bandini buzgani uchun 28 ming AQSh dollari miqdorida jarima toʻlaydi;
2) Tartib-intizom kodeksining 34.1 va 34.3 bandlarini buzgani uchun shartli ravishda (!) 21 ming AQSH dollari miqdorida jarima. Bu band agar yaqin 2 yil ichida shu holat yana takrorlansagina faollashadi;
3) Tartib-intizom kodeksining 1-paragrafi boʻyicha 90 kun ichida 7 ming AQSH dollari toʻlash majburiyati.
Shuningdek, shunday holat yana qaytarilsa, bundan ham qattiqroq chora koʻrilishi taʼkidlangan.
