O‘zbekistonning Malayziyadagi elchisi Ravshan Usmanov Kuala-Lumpur shahrida bo‘lib o‘tgan Xalqaro mental arifmetika musobaqasida muvaffaqiyatli ishtirok etgan o‘zbekistonlik o‘quvchilar bilan uchrashdi, deb xabar bermoqda “Dunyo” AA muxbiri.
Mazkur xalqaro tanlovda dunyoning 40 mamlakatidan saralash bosqichi natijasi o‘laroq, 15 mamlakatdan 5 yoshdan 13 yoshgacha bo‘lgan «ALOHA Mental Arithmetic» matematika maktablarining 700 nafardan ortiq o‘quvchilari ishtirok etishdi.
O‘zbekistonlik 33 nafar o‘quvchi Indoneziya, Kanada, Meksika, Xitoy, Xorvatiya, Ekvador, Hindistondan kelgan bolalar bilan matematika bo‘yicha o‘zaro kuch sinashib, mamlakatimiz sharafini munosib himoya qildi.
Musobaqa ishtirokchilaridan turli murakkablik darajasidagi matematika hisob-kitoblarini yuqori tezlikda amalga oshirish talab etildi. Natijada O‘zbekistonning barcha vakillari sovrinli o‘rinlarga sazovor bo‘lishdi. Xususan, 14 nafar o‘quvchimiz «Grand Champion», 6 nafari “Champion” kubogini qo‘lga kiritdi. Mamlakatimiz vakillari hammasi bo‘lib 6 ta oltin, 3 ta kumush, 4 ta bronza medalini qo‘lga kiritishdi.
